आमच्या विद्या मंदिरात तीन प्रमुख विभाग आहेत. नर्सरी, पूर्व प्राथमिक व प्राथमिक व प्राथमिक विभाग. यांतून एकूण ८७४ विद्यार्थी ज्ञानार्जन करत आहेत. स्मार्ट विद्यार्थी घडविण्यासाठी स्मार्ट क्लासची गरज ओळखून ई-सेन्स व इंटरएक्टीव्ह-बोर्ड ची सोय शाळेत करण्यात आली आहे. विद्यार्थ्यांच्या सुरक्षतेसाठी ४४ सी.सी.टीव्ही कॅमेरे, आनंददायी शिक्षणासाठी बोलक्या चित्रमय भिंती, मनोरंजनासाठी चिल्ड्रन प्ले-पार्क, प्रशस्त क्रीडांगण, भव्य इमारत, विद्यार्थ्यांचे आरोग्याहित साधण्यासाठी व दप्तरांचे ओझे कमी करण्यासाठी आर.ओ. प्युरीफायरची सुविधा, सुसज्ज ग्रंथालय, अत्याधुनिक संगणक कक्ष हि काही वैशिष्टे म्हणजे जणू सुकाणूच!

आमच्या शाळेतील प्रत्येक विद्यार्थी सर्वगुण संपन्न व्हावा हे ध्येय साध्य करण्यासाठी वैविध्यपूर्ण उपक्रमांचे आयोजन शाळेत केले जाते. गायन वादनांचे शास्त्रशुद्ध प्रशिक्षण, कराटे, क्सपिंग, स्केटिंग, अशा खेळांचे मार्गदर्शन, योग प्रशिक्षण, स्पर्धा परीक्षांचे मार्गदर्शन, संस्कार वर्ग, अप्रगत विद्यार्थ्यांसाठी विशेष वर्ग, स्पोकन इंग्लिशचे तास, कला व कार्यानुभव यांचे  आंतरशालेय वकृत्व स्पर्धा, प्रत्यक्ष क्षेत्रभेट, सहल या सर्व उपक्रमातील सहभागांनी आमच्या विद्यार्थ्यांची परिपूर्ण जडण-घडण होत आहे. तसेच शासनाच्या नियमानुसार सातत्यपूर्ण व सर्वंकष मूल्यमापनांअंतर्गत विविध प्रकारच्या परीक्षा-पुस्तकांसह चाचणी, सरप्राईज टेस्ट, घटक चाचण्या, संकलित चाचण्या शाळेत घेतल्या जातात. पालकांच्या समक्ष प्रत्येक चाचणीचा निकाल ठेवून विद्यार्थ्यांमध्ये सुधारणा केली जाते. त्याचबरोबर १४ नोव्हेंबर, बालदिनाचे औचित्य साधून शाळेत विविधांगी स्पर्धांचे आयोजन केले जाते. यामध्ये चित्रकला, हस्ताक्षर, रांगोळी, वकृत्व, कथाकथन, क्ले-मोल्डिंग, शब्दलेखन, स्मरणशक्ती, वेशभूषा या स्पर्धांमध्ये विद्यार्थी नवनिर्मितीचा सादरीकरणाचा आनंद घेतात.

विद्यार्थ्यांच्या क्रीडा- कौशल्यास वाव मिळावा म्हणून भव्य क्रीडा सप्ताहाचे आयोजन केले जाते. शाळेत वर्षभरात घेतल्या जाणाऱ्या स्पर्धा, परीक्षा, खेळ यात सरस ठरलेल्या विद्यार्थ्यांचा यथोचित गौरव वार्षिक पारितोषिक वितरणाच्या वेळी केला जातो. तसेच विद्यार्थ्यांच्या सुप्त कलागुणांना वाव देण्यासाठी जल्लोषपूर्ण स्नेहसंमेलन शालेय प्रांगणात साजरे केले जाते.

विद्यार्थ्यांच्या शैक्षणिक विकासाबरोबर सामाजिक कार्याचा वसा देखील शाळेनीअखंड जोपासला आहे. म्हणूनच दरवर्षी शाळेत भव्य रक्तदान शिबिराचे आयोजन केले जाते. पालकांना आपल्या पाल्याशी निघडीत येणाऱ्या समस्यांच्या निराकरणासाठी दरवर्षी तज्ञ समुपदेशकांचे व्याख्यान आयोजित केले जाते.

तमसो मां ज्योतिर्गमय या ब्रीद वाक्याप्रमाणे विद्या मंदिराची वाटचाल अविरत सुरु आहे. म्हणूनच आमचे विद्यार्थी विविध क्षेत्रात यशोशिखरावर विराजमान होत आहेत. दमाणी विद्या मंदिर नव्या बदलांचा, शिक्षण प्रणालीचा, बदलत्या जगाचा, विद्यार्थ्यांच्या उज्वल भविष्याचा, नव्या राष्ट्रनिर्मितीचा नेहमीच साक्षीदार राहील असा माझा दृढ विश्वास आहे. धन्यवाद..!