विद्यार्थ्यांसाठी अत्याधुनिक सोयी सुविधांनी शाळेची इमारत सजलेली आहे. इ. १ ली ते इ. १० वी पर्यंतच्या सर्व स्मार्ट वर्गात अत्याधुनिक तंत्रज्ञानाच्या सहाय्याने अध्यापन केले जाते. विद्यार्थ्यांच्या सुरक्षिततेसाठी सीसीटीव्ही कॅमेरे, उत्तम आरोग्यासाठी अत्याधुनिक आर. ओ. वॉटर प्यूरिफायरची सोय आहे. वैज्ञानिक उपकरणांनी सुसज्ज अशी प्रयोगशाळा, नवनवीन तंत्रज्ञाना आत्मसात करण्यासाठी संगणक कक्ष तसेच विविध खेळ खेळण्यासाठी आणि क्रीडा प्रकारांचा सराव करण्यासाठी शाळेचे मैदानही उपलब्ध आहे. विद्यार्थ्यांची वाचन अभिरुची संपन्न करण्यासाठी शाळेचे ग्रंथालयही सज्ज आहे.

विद्यार्थ्यांच्या सर्वांगीण विकास हाच आमचा ध्यास असल्यामुळे शाळेमध्ये विद्यार्थ्यांचा बौद्धिक, शारीरिक आणि मानसिक विकास होण्यासाठी शैक्षणिक व सामाजिक उपक्रम आयोजित केले जातात. शासनातर्फे इ. १ ते इ. ८ वी च्या विद्यार्थ्यांसाठी घेतल्या जाणाऱ्या पायाभूत व संकलित चाचण्या व्यतिरिक्त सर्व विषयांची सराव परीक्षा प्रत्येक महिन्यात घेतली जाते. व पालकांना पाल्याची प्रगती कळविण्यात येते. शासनातर्फे घेतली जाणारी इ.५ वी आणि इ. ८ वी साठीची शिष्यवृत्ती परीक्षा, एम.टी.एस., सायन्स-मॅथस्, सायबर ऑलिंपियाड, डॉ. होमी भाभा विज्ञान परीक्षा इ. परीक्षांमध्ये शाळेचे विद्यार्थी उत्तुंग यश मिळवितात. विद्यार्थ्यांच्या उत्तम करियरसाठी आय.आय.टी. फौंडेशनच्या तासांचे आयोजन हि शाळेमध्ये केले जाते.

अप्रगत विद्यार्थ्यांना जलद प्रगत शिक्षण प्रवाहात आणण्यासाठी शाळेच्या वेळेव्यतिरिक्त जादा तासांचे आयोजन केले जाते. विद्यार्थ्यांच्या सुप्त कलागुणांना वाव मिळावा म्हणून हस्ताक्षर, चित्रकला, निबंध, मेहंदी, रांगोळी इ. अंतरवर्गीय स्पर्धा घेतल्या जातात. शहर पातळीवर भव्य वकृत्व स्पर्धांचे आयोजनही शाळेमध्ये केले जाते.

विविध स्पर्धा परीक्षेमध्ये यशस्वी होणा-या विध्यार्थ्यांचा व खेलाडूंचा गुणगौरव क्रीडा सप्ताहामध्ये तसेच वार्षिक पारितोषिक वितरण समारंभात केला जातो. गुणवंत विद्यार्थ्यांचा हा गौरव इतर विद्यार्थ्यांना प्रेरणादायी ठरतो.
शाळेच्या प्रगतीमध्ये शिक्षक तसेच पालकांचाही सिंहाचा वाट असतो. या सोशल मिडीयाच्या काळात पाल्य आणि पालक यांच्यात सुसंवाद घडावा म्हणून पालकांसाठी पालक मेळावा, व्याख्याने इ. उपक्रम आयोजित केले जातात. आजच्या आधुनिक तंत्रज्ञानाच्या जगात विद्यार्थ्यांमध्ये ‘सामाजिक जाणीव’ निर्माण व्हावी म्हणून काही सामाजिक उपक्रम देखील शाळेमध्ये राबविले जातात.

आजचा विद्यार्थी या देशाचा भावी नागरिक आधुनिक तंत्रज्ञानाने परिपूर्ण, शिस्तबद्ध व संस्कारी असावा यासाठी या शाळेत कार्यरत असलेले शिक्षक सदैव मार्गदर्शनासाठी सज्ज असतात. प्रेरणादायी संस्थाचालक, तज्ञ शिक्षक, गुणी व मेहनती विद्यार्थी, सहकार्य करणारे पालक यांच्या प्रयत्नांमुळे हा ‘ज्ञानदीप’ सदैव तेवत राहो हि सदिच्छा..!